حسد اور بغض کا بہترین علاج

بغض حسد سے پیدا ہوتا ہے۔ دل میں پہلے دوسرے کی طرف سے حسد پیدا ہوتا ہے کہ وہ آگے بڑھ گیا، میں پیچھے رہ گیا، اور پھر اس کے آگے بڑھ جانے کی وجہ سے دل میں جلن اور کڑھن پیدا ہوتی ہے، اور دل میں یہ خواہش پیدا ہوتی ہے کہ اس کو کسی طرح کا نقصان پہنچ جائے، یہ مزید آگے نہ بڑھ سکے۔ اب اس کو نقصان پہنچانا اختیار میں نہیں ہے، اس کے نتیجے میں جو گھٹن پیدا ہوتی ہے اس سے انسان کے دل میں بغض پیدا ہو جاتا ہے۔ لہذا بغض سے بچنے کا پہلا راستہ یہ ہے کہ اپنے دل سے پہلے حسد کو ختم کرے۔

بزرگوں نے حسد دور کرنے کا علاج یہ بیان فرمایا کہ جس شخص کے آگے بڑھ جانے کی وجہ سے جلن ہو رہی ہو اس شخص کے حق میں دعا کرے کہ یا الّٰلہ اس کو اور ترقّی عطا فرمائیے۔ جس وقت یہ دعا کرے گا تو اس کے دل پہ آرے چل جائیں گے کیونکہ دل تو یہ چاہ رہا ہے کہ اس کا نقصان ہو، اور دعا یہ کر رہا ہے کہ اس کی ترقّی ہو، لیکن زبردستی یہ دعا کرتا رہے۔ بلکہ اس کو اطلاع بھی کردے کہ میں تمہارے حق میں ترقّی کی دعا کرتا ہوں۔ انشاٴ الّٰلہ اس علاج کے کرتے رہنے سے حسد دور ہو جائے گا۔

ماخوذ از بیان "بھائ بھائ بن جاؤ" از مفتی محمد تقی عثمانی دامت برکاتہم